БИШКЕК, 17-фев. — Sputnik. Казакстандан 204 тонна унду мыйзамсыз алып келип, кыргыз-казак чек арасындагы "Маймак" темир жол станциясына түшүрүп жаткан жарандар кармалганын мамлекеттик чек ара кызматынын маалымат кызматы билдирди.
16-февралда Талас чек ара отряды "Сатыкей" заставасынан коңшу мамлекеттен мыйзамсыз ун ташып келгендерди кармаган. Кыргызстандын жарандары товар ташуучу вагон менен ун алып келип, аны "Маймак" темир жол станциясына түшүрүшкөн. Бирок, аталган станциядан товар алып өтүүгө болбогондуктан ал жерден кайсы бир товарларды түшүрүүгө жана жүктөөгө болбойт.
Мыйзамсыз алып келинген ундун баасы 4,8 миллион сомду түзөт. Бул иш боюнча документтер толтурулган соң, кармалган жарандар товары менен чогуу тийиштүү тараптарга өткөрүлүп берилди.
