Алгач, Афганистандагы согушта курман болгондорго тургузулган эстеликке гүл чамбарлар коюлуп, кайтпай калгандарды үн катпай эскеришти.
Башкы консул Кудряшов афганчы-жоокерлер россиялык жана кыргызстандык кийинки муундарга кайратмандыгы, баатырдыгы менен үлгү боло аларын айтты.
"Афганистандан советтик акыркы жоокерлер чыгарылып кеткенден бери 27 жылга аяк басыптыр. Ал жылдары Советтер союзу эл аралык масштабга чыга баштаган терроризмге каршы турган биринчи өлкө болгон…. Батыштын алысты көрө албаган саясатынан улам, Афганистан азыр дүйнөгө коркунуч жараткан эл аралык терроризмдин уюгуна айланып отурат", — деди Кудряшов.
Афганистан согушунун ардагерлеринин төрагасы Беделбай Маматовдун айтымында, бүгүнкү күндө Ош облусунда Афганистан согушунун 1 600, ал эми Ош шаарында 418 ардагери жашайт.
Иш-чаранын жыйынтыгында жоокерлердин арбактарына Куран окулду.
