БИШКЕК, 1-фев. — Sputnik. Вице-премьер Гүлмира Кудайбердиева Москва шаарында тигүү цехиндеги өрттөн улам каза болгон мекендештер боюнча Кыргызстандын Россиядагы элчилигинде жыйын өткөрдү. Бул тууралуу өкмөттүн маалымат кызматы билдирди.
Үстүбүздөгү жылдын 30-январында Москвадагы цехте өрт чыгып, 12 киши каза болгон. Анын сегизи Кыргызстандын жараны болсо, экөө Россиянын жарандыгын алган этникалык кыргыз жана эки өзбекстандык жаран экени белгилүү болду. Учурда каза болгондордун аты-жөнү такталды.
Жыйын учурунда сөөктөр азырынча тааныла электиги, ал үчүн ДНК экспертизасынын зарылдыгы белгиленди. Мындан тышкары, сөөктөрдү идентификациялоо үчүн кыска мөөнөттө каза болгондордун жакындарын табуу керектиги айтылды.
Кудайбердиева премьер-министр Темир Сариевдин тапшырмасы менен маркумдардын сөөгүн Москвадан Кыргызстанга жеткирүү маселеси чечилип жатканын белгиледи.
