БИШКЕК, 1-фев. — Sputnik. Москванын Сокольники аймагындагы Стромынка көчөсүндө жайгашкан цехтен чыккан өрттөн 12 киши каза болду. Алардын 10у кыргызстандыктар экенин КРдин Россиядагы элчилигинин маалымат кызматы билдирди.
Алдын ала маалыматтар боюнча тигүү цехинде чыккан өрртөн 12 киши каза болсо, алардын сегизөө кыргызстандын жарандары болгон. Анын ичинде бир өспүрүм да бар. Алардын бары тең Баткен облусунан болушкан. Калган эки жаран Россиянын жарандары болгон (этникалык кыргыздар) жана Өзбекстандын эки жараны бар болгон.
"Тигүү цехинин төрт кызматкерин гана куткарып калууга мүмкүн болгон. Алардын экөө кыргызстандык, Россиянын бир жараны (этникалык кыргыз) жана бир өзбекстандык. Каза болгондор тууралуу маалыматтар такталып жатат. Расмий маалыматтар тийиштүү экспертизанын жыйынтыгында маалым болот", — деп айтылат элчилик тараткан маалыматта.
Буга чейин өрттөн Орто Азиядан келген мигранттар каза болушу мүмкүн деп маалымдалган.
Москва прокуратурасы дагы тергөө иштерин баштады.
Кыргызстандын Россиядагы элчилигинин вице-консулу кырсык болгон жерге барып, Сокольники ИИБине жана Тергөө башкармалыгында да болду.
Элчилик өрттүн чыгышы боюнча тергөө иштерин өз көзөмөлүнө алды, жабыр тарткандарга жана алардын жакындарына тийиштүү жардамдар берилет.
