Өткөн кылымдардагы кыргыздардын сүрөттөрү. Бай менен томояк. Өргөө менен алачык

Кыргыз элинин кийимдеринин өзгөчөлүгүнө көчмөндүк жашоо образы эле эмес, катаал климат да таасир эткен. Сүрөттөгү балдар кийип турган малакай менен кишилердин башындагы тебетей абдан жылуу болгон. Ал эми жылуу болуш үчүн береги кийип турган чапандардын ортосуна пахта салып, шырып тигишкен

Сыртына чий каланган боз үйүнүн жанында турган кыргыз үй-бүлөсү. Сүрөт "Көчмөн кыргыздын талаадагы боз үйү" деп аталат

Бул оокаттуу жердин кызы экендигин башындагы тебетейи, мойнундагы шуру-мончоктору жана кийип турган чапанынан боолголосок туура болчудай. Беш көкүл өрүлгөн чачы менен капкара каштары көзгө дароо урунат

Байлар менен манаптардын кыз-келиндери түркүн-түстүү жибек баштаган баалуу кездемелерден тигилген көйнөк-чапандарды кие турган. Сүрөттөгү атластан тигилген чапанчан жана анын жанындагы аял күмүш, баалуу таштардан жасалган чач уштуктар менен отурат. Башындагы элечекке караганда, кыязы булар түштүк аймактын жашоочулары

Орто жашаган кыргыздардын аялдары менен кыздарынын кийими өзгөчө бапестеп тигилген эмес. Ашыкча кооздолбостон, көйнөк, чапан жана баш кийимден турган. Албетте, колундагы оокатына карап, күмүштөн же ар кыл таштардан жасалган чолпу, чач уштук тагынышкан. Береги сүрөттөгү кичинекей кыздан башында – үкү топу. Кичинекейлерге шырылган чапандар кийгизилген

Дербиш, думаналар жөнөкөй кыргыздардан кийген кийими, жүрүм-туруму менен кескин айырмалана турган

Бул үй-бүлө мүчөлөрүнүн кийинип тургандыгынан улам абдан эле оокаттуу экендигин байкоого болот

Сүрөттөн XX кылымдын аягында жашаган кыргыздардын эркектеринин, аялдарынын, балдарынын кийингенин жана боз үйдүн ичин көрө алабыз. Төрдө жууркандар жана саймаланган оокат жыйылып турат. Отурган аялдын белдемчиси кештеленип сайылып, мыкты уздун колунан чыккандыгы көрүнүп турат

Үй-бүлө анча оокаттуу болбогону менен аял жакшы көйнөк-чапан, жупуну эмес баш кийим жана шуру-чачпак менен отурат

Биз көркөм чыгармалардан окуп жүргөн томояктар, кыязы ушундай шартта жашаган. Сүрөттө кадимки кара алачык

Бөбөгү менен турган өспүрүм кыз. Чачын беш көкүл өрүп, тебетей кийип алган. Чапаны топчулар жана тегерек күмүштөр менен кооздолгон

Сарыбагыш уруусунун манабы, эл башы Шабдан Жантаев. Кынаптап тигилген чапан, көкүрөгүндө орден, сыйлыктары, ал эми бутунда кымбат баалуу кепич-маасы.