БИШКЕК, 23-дек. — Sputnik. Сокулуктун Ново-Покровка айылында жер тилкесин эки башка жаранга сатып, документтерин бербей бир жылдан бери из жашырып жүргөн 51 жаштагы аял кармалганын Чүй облусунун БИИБ билдирди.
Маалыматка ылайык, милицияга 22 жаштагы Жалал-Абад облусунун тургуну кайрылып, аталган айылдан 2014-жылы 4 сотых жер тилкесин төрт миң долларга сатып алганын, бирок жердин документине ээ боло албай жүргөнүн айткан.
Ушундай эле арыз менен Фрунзе айылынын тургуну кайрылган. Анын айтымында, үстүбүздөгү жылдын март айында кармалган алдын айтканына кирип, ошол эле райондон 2000 долларга жер тилкесин сатып алган. Бирок ушул маалга чейин документтен же акчадан жок алданып кала берген.
Иликтөө иштеринин натыйжасында кылмышка шектүү катары Бишкек шаарынын тургуну кармалган. "Шылуундук" боюнча кылмыш иши козголуп, тергөө иштери жүрүп жатат.
