БИШКЕК, 10-дек. – Sputnik. "Ислам террористтери", "Ислам мамлекетти", "исламчылар" деген терминдерди динди жаманатты кылып колдонбоо керек. Ар бир нерсени атынан атап, адам өмүрүн алган жаман жолдорго баргандарды зөөкүр же террорист деп атынан атоо зарыл. Мындай пикирин Муфтияттын тышкы иштер бөлүмүнүн башчысы Акимжан ажы Эргешов дин жана терроризм тууралуу болгон тегерек столдо билдирди.
Эргешов, дин, терроризм жана экстремизм тууралуу окуяларга дин боюнча илими бар адистер гана жооп бериши керектигин айтат. Себеби, дин боюнча толук түшүнүгү жок, терроризм менен динди ажырата билбеген эксперттер элге туура эмес маалымат берип жатканын белгиледи.
Ал ошондой эле, кишинин сырткы көрүнүшүнө же анын кандайдыр бир өзгөчөлүгүнө карата – сакал коюп, хиджап кийгени үчүн басмырланбашы керектигин кошумчалады.
