БИШКЕК, 9-дек. — Sputnik. АКШнын мамлекеттик катчысы Жон Керри кийинки жумада Россияга келип, Сирия жана Украина боюнча сүйлөшүүлөрдү өткөрүүгө ниеттенип жатканын Ассошиэйтед Пресс маалымат агенттиги билдирди.
Агенттиктин маалыматы боюнча, Парижге келген Керри Москвага "бир жумадан" кийин бара турганын айтып, Владимир Путин менен жана тышкы иштер министр Сергей Лавров менен жолугууну көздөп жатканын белгилеген.
Ассошиэйтед Пресс агенттигинин билдиришинче бул Керринин бир жылда Россияга болгон экинчи сапары болушу ыктымал. Керри акыркы жолу май айында Россиянын Сочи шаарында болгон жыйынга келип, Путин жана Лавров менен жолуккан.
Ал арада Путиндин маалымат катчысы Дмитрий Песков Москвага келүүнү пландап жаткан Керри менен Путиндин жолугушуу ыктымалдыгын четке каккан жок, деп жазат Sputnik Türkiye маалымат агенттиги.
