БИШКЕК, 7-дек. — Sputnik. Эртең, 8-декабрь күнү атагы алыска кеткен улуу ырчы Мыскал Өмүрканованын 100 жылдыгына арналган салтанаттуу иш-чара өтөрүн Маданият, маалымат жана туризм министрлиги билдирди.
Маараке улуттук филармониянын чоң залында саат 15.00дө белгилүү режиссер Темир Бирназаров тарткан "Мыскал эже" аттуу даректүү тасма менен башталат. Салтанаттуу иш-чара ири программадагы концерт менен коштолмокчу.
Быйыл Мыскал Өмүрканованын 100 жылдык мааракеси республикалык деңгээлде белгиленип жатат. Анын алкагында салтанаттуу азем Сокулук районунда, өзү туулуп-өскөн Жумгал районунун Баш-Кууганды айылында жогорку деңгээлде белгиленип, айылдын маданият борборуна Мыскал Өмүрканованын ысымы ыйгарылды. Имараттын алдына ырчынын колуна комуз кармап элге таазим кылып турган эстелиги тургузулду.
