БИШКЕК, 26-ноя. — Sputnik. Россиянын Екатеринбург шаарында өтө турган киномектептердин XII Эл аралык "Кинопроба" фестиваль-практикумунда жаш режиссер Кенжебек Шайлообаевдин "Тегирмен" тасмасы ат салыша турганын Кинематографты өнүктүрүү фонду билдирди.
Маалыматка ылайык, иш-чара 1-5-декабрь күнү өтүп, ага дүйнөнүн булуң-бурчундагы киномектептердин өкүлдөрү катышат. Фестиваль сынак менен маалымат программасынан тышкары, жарнама ролиги, окуу жана илимий-популярдуу тасма тартууда анимациялык жана видеотехнологияларды колдонгондор үчүн мастер-класстарды да тартуулаганы менен айырмаланып турат.
"Тегирмен" Шайлообаевдин дипломдук иши болуп саналат. Ал фестивалдын негизги конкурсуна катышмакчы.
"Бүгүнкү күндө көптөгөн жаштар акча табуу үчүн чет өлкөгө чыгып кетип жатышат. Мен өзүмдүн тасмам аркылуу Кыргызстанда деле жакшы, татыктуу жашоого болорун айткым келди", — деди режиссер.
Шайлообаевдин тасмасынан тышкары, фестивалдын маалыматтык программасына Чолпонай Бөрүбаеванын "Топурак" фильми да катыша турганы маалым болду.
