БИШКЕК, 17-ноя. — Sputnik. Жарым коргоочу Антон Землянухиндин киргизген голу шедевр экенин башкы машыктыруучу Александр Крестинин беттеш аяктагандан кийин маалымат жыйында билдирди.
Кыргызстан менен Иорданиянын курама командалары Бишкек шаарындагы Дөлөн Өмүрзаков атындагы стадиондо беттешип, оюн 1:0 эсебинде Кыргызстандын пайдасына аяктады.
Анын айтымында, бул оюн жетиштүү деңгээлде эле болду. Анткени Иордания тажрыйбалуу атаандаш.
"Алар биринчи орунда болчу. Андыктан аларды теңибизге албай койсок болбойт эле. Биз жакшы даярданып, мыкты футбол көрсөттүк деп ойлойм", — деди ал.
Ал ошондой эле, оюн аяктагандан кийин эки команданын оюнчуларынын ортосуна эмне болгонун көрбөгөнүн айтты.
Крестинин улуттук кураманын күйөрмандары эң мыкты экенин кошумчалады.
Ошентип, иорданиялыктар 13 упай топтосо, Кыргызстандын курама командасы 11 упай топтой алды. "В" тайпасында 15 упай менен австралиялыктар биринчи келе жатса, экинчи жана үчүнчү орунда Иордания менен Кыргызстан турат. Төртүнчү орунда Тажикстан (5 упай) жана акыркы орунду 1 упай менен Бангладеш ээледи.
Футбол боюнча Дүйнөлүк чемпионат 2018-жылы Россияда өтөт.
