Командалар дүйнөлүк чемпионаттын тандоо раунддарынын алкагында беттешти.
Биринчи таймда оюн эсеби 0:0 менен аяктаган. Бирок, экинчи таймдын башында жарым коргоочу Антон Землянухиндин атаандашынын дарбазасына тепкен тобу эсепти ачты.
Иорданиялыктар эсепти теңөөгө аракет кылды. Бирок, майнап чыккан жок. Ошондой эле, кыргызстандыктардын да бир нече жолу гол киргизүүгө мүмкүнчүлүгү болгону менен аны колдоно алышкан жок.
Ошентип, иорданиялыктар 13 упай топтосо, Кыргызстандын курама командасы 11 упай топтой алды. "В" тайпасында 15 упай менен австралиялыктар биринчи келе жатса, экинчи жана үчүнчү орунда Иордания менен Кыргызстан турат. Төртүнчү орунда Тажикстан (5 упай) жана акыркы орунду 1 упай менен Бангладеш ээледи.
Футбол боюнча Дүйнөлүк чемпионат 2018-жылы Россияда өтөт.
Кыргызстан менен Иорданиянын беттеши Дөлөн Өмүрзаков атындагы стадиондо өттү
Кыргызстандын курама командасы оюн алдында дене-боюн жазып алышты
Оюндун башында командалар кезектешип, бир-бирине чабуулга өтүшкөнү менен майнап чыккан жок
Эки команда тең мыкты даярдыкта экени оюндун жүрүшүндө байкалды
Кыргызстан өз үйүндө өткөргөн акыркы оюнун активдүү өткөрдү
Бука моюн, буура сан футболчулар
Кыргызстандын курама командасынын оюнчуларын экиден коргоочу кайтарып жүрдү
Күйөрмандар оюнчуларды кызуу сүрөөнгө алып, колдоп турушту
Айрым учурларды кыргызстандык оюнчулар үстөмдүгүн көрсөтүп жатты
Топ тоголок, тараза ташы кимге оорун алдын ала айтуу кыйын
Күйөрмандар колдоруна Кыргызстандын желегин кармап алып команданы сүрөөнгө алып турду
Гооол! Кыргызстандыктардык оюнчулардын сүйүнүчүндө чек жок
Күйөрмандардын арасында беттерине атаандаш мамлекеттин желектерин тартып келгендер болду
Үмүтсүз шайтан дейт. Бирок, Иорданиянын курама командасынын оюнчусу эмки голду алар киргизээрине ишенет
Кыргызстандыктардын жеңишин чет элдиктер да бөлүштү. "Кыргызстан" деп кыйкырган күйөрман
Оюн аяктагандан кийин командалардын оюнчулары кайым-айтышып кетти. Аларды башкалар ажыратышты
