БИШКЕК, 14-ноя. — Sputnik. Премьер-министр Темир Сариев күч структураларына коопсуздук чараларын күчөтүү тапшырмасын бергенин өкмөттүн маалымат кызматынын жетекчиси Назира Ахмедова билдирди.
Анын айтымында, өкмөт башчы УКМК жана ИИМге Францияда болгон ири терактылардан улам коопсуздукту камсыздоону тапшырды.
"Атайы кызматтарда мындай учурларга карата түзүлгөн иш-аракеттердин планы бар. Учурда күч структуралары ири соода түйүндөрүнүн, базар жана социалдык объектилердин коопсуздук кызматтары менен тыгыз иш алып барууда. Эл көп чогулуучу жерлер коргоого алынды", — деди Ахмедова.
Өкмөттүн маалымат кызматы Сариев франциялык кесиптеши Мануэль Вальска көңү айтуу телеграммасын жолдогонун белгиледи.
"Парижде адам өмүрүнө забын болгон террористтик актыларды терең кайгыруу менен кабыл алдык", — деп айтылат телеграммада.
Өкмөт башчы каза болгондордун жакындарына көңүл айтып, жабыркагандардын тез арада сакайып кетишин каалады.
