БИШКЕК, 14-ноя. — Sputnik. Премьер-министр Темир Сариев Ысык-Көл облусуна болгон бир күндүк иш сапарынын алкагында Балыкчы шаарындагы "Каухар-Таш" темир-бетон заводунун иши менен таанышып чыкканын өкмөттүн маалымат кызматы билдирди.
Премьер-министр заводдон мындай ишканалардын иштеши маанилүү экенин белгилеп, туруктуу түрдɵ иш алып баруусуна кɵмɵктɵшүү керектигин билдирди. Мындан тышкары, Балыкчы — Корумду жолун оңдоо иштери башталып жатканын маалымдап, завод чыгарган продукцияны курулуш үчүн пайдаланууга мүмкүнчүлүк бар экенин кошумчалады.
"Жакынкы жылдары Ысык-Кɵл шакекчесин куруу башталат. Муну менен катар Балыкчы, Чолпон-Ата, Каракол шаарларындагы суу түтүктɵрү жаңыртылат. Анын алкагында келишим түзүп, заказдарды кабыл алуу менен ɵндүрүштүн кɵлɵмүн кеңейтүүгɵ болот. Бул үчүн жеңилдетилген кредиттерди колдонуу керек. Ошол эле учурда облус жана шаар жетекчилиги заводго колдоо кɵрсɵтүшү зарыл", — деди Сариев.
Заводдун жетекчилиги Балыкчы — Корумду жолун оңдоо үчүн алгачкы заказдарды кабыл алганын маалымдады. 1979-жылы курулган завод учурда 63 адамды иш менен камсыз кылат.
