БИШКЕК, 14-ноя. — Sputnik. Бизнеске же бирөөнүн мүлкүнө мыйзамсыз түрдө кийлигишүү, бир нерсе талап кылуу аракеттери дароо текшерилип, ага каршы катуу чаралар көрүлүшү керек. Бул тууралуу премьер-министр Темир Сариев
өкмөттүн кеңейтилген жыйынында билдирди.
Анын айтымында, Жогорку Кенеш өкмөт курамын бекитип бергени анын кынтыксыз иштеп, ишинде эч кандай кемчилик жок дегенди билдирбейт.
"Азыр дүйнөлүк экономикалык кризистин таасири көпчүлүк өлкөлөргө сезилип жатат. Алдыбызда өтө көп чакырык турат. Ушундай кырдаалды эске алуу менен өкмөттүн алдына жакынкы жылдары финансылык жана экономикалык көз карандысыздыкка жетишүү боюнча тапшырма коюлду", — деди Сариев.
Өкмөт башчы дагы бир келечектүү багыт катары бизнес ачуу жана жүргүзүү үчүн бардык шартты түзүп, Кыргызстанды "бизнес үчүн бейишке айландырууну" атады.
"Ар бир инвестор Кыргызстанда салган каражатынын коопсуз экенине жана анын кайтарылышына бекем ишенип, кепилдик болушу керек. Буга байланыштуу бардык текшерүү жана көзөмөлдөөчү органдарга бизнестин отчеттуулугу жана текшерүүнү иретке салуу боюнча кардиналдуу чараларды иштеп чыгуу тапшырмасын берем. Бизнеске же бирөөнүн мүлкүнө мыйзамсыз түрдө кийлигишүү, бир нерсе талап кылуу аракеттери дароо текшерилип, ага каршы катуу чаралар көрүлүшү керек", — деди премьер-министр.
Премьер-министр Өкмөттө мурункудай эле тартип, жоопкерчилик жана иштин сапаты негизги талап бойдон каларын эскертти.
