БИШКЕК, 3-ноя. — Sputnik. ЕЭКтин атаандаштык жана монополияны жөнгө салуу министри Нурлан Алдабергенов ЕАЭБдин аймагында уюлдук байланыштагы роумингдин кызматын акысыз кылууну сунуштады.
Бул боюнча сунушун ал ЕЭКтин атаандаштык жана монополияны жөнгө салуу боюнча комитеттин жыйынында айтты. Анда роуминг кызматынын тарифтерин төмөндөтүү жана атаандаштыкты өнүктүрүү маселеси талкууланган.
Жыйындын соңунда Алдабергенов "ЕАЭБдин бардык, беш өлкөлөрүнүн уюлдук компаниялары жакынкы аралыкта роуминг кызматына болгон бааны төмөндөтө тургандыгын" белгиледи. Муну менен катар аталган интеграциялык уюмдун мүчө өлкөлөрүнүн аймагындагы уюлдук байланыш боюнча компанияларды эл аралык байланыштын бул түрүн бекер кылууга чакырды.
Учурда ЕЭК ЕАЭБдин монополияны жөнгө салуу боюнча органдары менен адилеттүү роуминг принциптерин ишке ашыруу ишин улантууда. Аталган ведомстводон уюлдук компаниялар роумингдин наркын аразандатуу жаатында өз ара иштешүү механизмдерин талкуулап жаткандыгын билдирди.
