БИШКЕК, 30-окт. — Sputnik. Алмазбек Атамбаев президенттин фондунан абийирин сактайм деп 7-кабаттан кулап кеткен Канайымга 300 миң сом жардам берди. Бул тууралуу өлкө башчынын маалымат кызматы билдирди.
Зордукчудан кутулуу үчүн жетинчи кабаттын балконунан алтынчы кабатка түшөм деп тайып кулап кеткен Канайымга Москва шаарындагы Сергей Боткин атындагы клиникалык ооруканада операция жасалган. Биринчи операциясы үчүн 500 миң рубль керектелген. Дарыгерлер ага экинчи операция да кылуу керектигин айтып, 300 миң рубль керектеле турганын Канайымдын апасы Гүлшан Матаева билдирген эле.
Россиядагы мекендештер 98 500 рублга жакын каражат топтоп беришкен.
Каргашалуу окуя 19-сентябрда болгон. Үйүн жыйнатам деп чакырган жаран ал ишин аяктап калганда ага тийишип, арам оюн ишке ашырууга аракет кылган. Канайым андан качып, 7-кабаттын балконунан алтынчы кабатка секирем деп колу тайып, жерге кулап түшкөн. Ал дароо жерге түшпөй, бак-дарактын үстүнө түшүп, омурткалары жана жамбашы сынган.
