БИШКЕК, 27-окт — Sputik. "Талибан" радикалдык тобунун согушкерлери Афганистандын түндүк-чыгышындагы Бадахшан провинциясында мектептерди жаап, эркек балдарды согушка алып кетип жатканы туурасында провинциянын губернаторунун орун басары Шах Валиауллах Адиб (Shah Waliullah Adeeb) билдирген.
Анын айтымында, согушкерлер Вардож аймагын өзүнө каратып алган соң, мектептердин баарын жаап окуучу балдарды согуш жүрүп жаткан жерге жиберүү үчүн алып кетип жатышат.
"Жакындан бери талибдер кичине балдарды согуш аракеттерине катыштыруу үчүн пайдалана баштады. Мектептер жабык, ал эми согушта талибдер тарапта курман болгондордун көпчүлүгү балдар болуп жатат", — деген чиновниктин сөзүн TOLO News телеканалы келтирген.
Өз кезегинде провинциянын билим берүү департаментинин башчысы Давлат Мохаммад "Талибандын" согушкерлери мектептерди жаап салган үчүн он миңдей бала эми окубай калды деп билдирген.
"Он миңдей окуучунун келечеги эмне болору белгисиз. Талибдер аларды согушканга мажбурлап, көпчүлүгүн Бахаракка жөнөтүп жатышат", — деди ал.
