БИШКЕК, 16-окт. — Sputnik. КР президенти Алмазбек Атамбаев Казакстанга болгон расмий иш сапарынын алкагында КМШ мамлекеттеринин өлкө башчыларынын жыйынына катышууда.
КМШ мамлекет башчылары чогуу сүрөткө түшкөндөн кийин тар чөйрөдө жолугуу үчүн атайын залга киришти.
КМШ мамлекет башчыларынын тар чөйрөдө жолугушуусун ачып жатып, Казакстандын президенти Нурсултан Назарбаев Кыргызстандын өлкө башчысы Алмазбек Атамбаевди Жогорку Кеңешке болгон шайлоонун ийгиликтүү өтүүсү менен куттуктады.
"Эл өзүнүн акылмандыгын көрсөтүп, бакубат мамлекетте жашоону кааларын ачык билдирди. Жаңы чакырылыштагы депутаттар интеграциялык процесстердин өнүгүүсүнө салым кошот деп ойлойм", — деди Назарбаев.
Тар чөйрөдөгү жолугушуулардан кийин КМШ мамлекет башчылары кеңири курамдагы жыйын өткөрөт.
Атамбаев кечээ иш сапары менен Казакстанга учуп кеткен.
