БИШКЕК, 28-сен. — Sputnik. АКШнын президенти Барак Обама менен дүйшөмбү күнү жеке жолугушууда Россия лидери ага: "Мен эскертпедим беле" деп айткысы келери бышык деп эсептейт Time журналынын кабарчысы Саймон Шустер.
Дүйшөмбүдө БУУнун Башкы ассамблеясына жасай турган кайрылуусунда Путин Сириядагы кризистен чыгуунун жолун сунушташы мүмкүн. Кеп аталган өлкөнүн президенти Башар Асадды колдоо жана "Ислам мамлекетине" каршы күрөшүү үчүн коалиция түзүү жөнүндө болушу ыктымал деп жазат Шустер.
Обама Россия менен макул болушу керекпи, эгер макул болсо, кандай шарттарды коё аларын чечүүгө аргасыз болот. Акыркы кездери АКШ лидеринин эң жакын шериктештери да кырдаалды жөнгө салыш үчүн Башар Асаддын өкмөтү менен иш алып баруу зарылдыгын моюнга алганына карабай, Обама үчүн Сириянын президентин колдоо жөнүндө маселе баарынан оор болушу мүмкүн.
"Эгер Путин өз сунушуна Обаманы макул кыла алса, өзүнүн 15 жылдык бийлигиндеги эң улуу дипломатиялык жеңишке жетет. Анда бул Жакынкы Чыгыштагы Россиянын СССР тарагандан берки эң көзгө көрүнөрлүк ролу болот", — деп жазат Шустер.
Ошондой эле ал санкцияларды алып салуу үчүн Батышка таасир бергенге Россиянын көбүрөөк мүмкүнчүлүгү пайда болушу ктымал экенин белгилейт.
Сирия боюнча Россиянын сунушун четке кагыш үчүн, Барак Обамада альтернативдүү план болушу керек. Бирок ал Россия менен же өнөктөш катары, же душман катары эсептешүүгө аргасыз болорун турмуш көрсөтүп турат.
