БИШКЕК, 15-сен. — Sputnik. Финансы полициясы 1,5 жыл аралыгында "Тазалык", "Бишкек жүргүнчү автоунаа ишканасы", "Зеленстрой" ишканаларына, мэриянын менчик курулуш жана капиталдык курулуш башкармалыктарына карата 20га жакын кылмыш ишин козгогонун шаардык муниципалитет билдирди.
Мыйзам бузуулар курулуш иштерин жасоодо, унаа тетиктерин сатып алууда, ирригациялык курулуштарды тазалоо, күйүүчү майды мыйзамсыз эсептен чыгаруу, муниципалдык жер тилкелерин ижарага берүү жана тийиштүү уруксатсыз курулуштарды курууда аныкталган.
Мындан тышкары, кылмыш ишин козгоого ижара акысын жасалма төмөндөтүү, фиктивдүү тендерлерди өткөрүү жана ЖОЖ аяктоо боюнча жасалма документ берүү себеп болгон.
Мэрия аталган кылмыш иштери учурда тергөөдө же сотко жөнөтүлгөнүн белгилейт.
