БИШКЕК, 15-сен. — Sputnik. Быйыл Кыргызстан боюнча 87 жайлоо бала бакчалары ачылып, 2200гө жакын бала мектепке чейинки билим алды. Бул туурасында "Роза Отунбаеванын демилгеси" эл аралык фондунан билдиришти.
Балдарды өнүктүрүү борборунда бөбөктөргө кинотасмалар жана мультфильмдер көрсөтүлүп, сөз өстүрүү сабагы өтүлүп, алар окуганды, пластилинден ар кыл буюмдарды, кагаздан оюнчуктарды жасаганды үйрөнүштү.
Бөбөктөргө билим берүүгө 30 райондун 80ге жакын айыл өкмөттөрү шарт түзүп берип, аларды бала бакчалардын тарбиячылары, мугалимдер, чет элдик жана жергиликтүү ыктыярчылар окутту.
Андан сырткары, жаратылыш, экология темасында ар кандай курстар өтүп, балдарга жан-жаныбарларга камкордук менен мамиле жасоо туурасында айтып беришти. Ошондой эле ата-энелерге балдарды туура тарбиялоого чакырылган адистер багыт берип, бир катар мастер-класстар өткөрүлдү.
