БИШКЕК, 28-авг. — Sputnik. Вице-премьер-министр Абдырахман Маматалиев Транспорт жана коммуникация министрлигине республикалык жолдорго багыты боюнча ажыратуучу тосмолорду (парапет) орнотуу тапшырмасын бергенин өкмөттүн маалымат кызматы билдирет.
Жол кайгуул кызматынын жетекчиси Сергей Дьяченконун маалыматы боюнча 26-август күнү эртең мененки саат сегизде "Хонда-Одиссей" унаасынын айдоочусу рулду башкара албай, жолдун каршы багытына чыгып, өз жолу менен келе жаткан "Лексус" унаасы менен кпгышкан.
"Натыйжада "Лексустун" айдоочусу менен жүргүнчүсү жаракат алып, Ивановка айылынын ооруканасына жеткирилген. Ал эми "Хонда-Одиссей" унаасындагы жети адам тең ошол жерде каза болгон. Учурда тергөө иштери жүрүп, тийиштүү экспертизалар жасалууда", — деди Дьяченко.
Мындан тышкары, жыйында жол эрежесин сактоо максатында Жол кайгуул кызматкерлерин фото, аудио жана видео каттоо каралган атайы жабдыктар менен жабдуу маселеси көтөрүлдү.
Жыйынтыгында Каржы министрлигине керектүү жабдуулар үчүн каражат маселесин чечүү тапшырылды.
