БИШКЕК, 28-авг. — Sputnik. "Түндүк электр" ишканасы Бишкек шаарында жыл аягына дейре 6/10-35 Киловольт жаңы кабель чубалгыларын алмаштырат. Бул тууралуу ишкананын маалымат кызматы билдирди.
Учурда 6/10 Киловольт кабелди тартуу үчүн аңдарды казуу иштери Тыналиев/Ахунбаев, Байтик баатыр/Медеров, Абдрахманов/Москва көчөлөрүндө жүргүзүлүүдө. Мындан кийин иштер Кусейин Карасаев атындагы Бишкек гуманитардык университети тарапта улантылмакчы.
Жалпысынан "Түндүк электр" 2015-жылы өз эсебинен борбор калаа боюнча 40 чакырымга жакын 6/10 Киловольт эскирген кабель тармактарын алмаштырууну пландоодо. Бул планды ишке ашырууга бөлүштүрүүчү компаниянын бюджетинен 22 миллион сом бөлүү мерчемделген.
27-августка карата 16 чакырым ашык кабель чубалгылары алмаштырылды.
