БИШКЕК, 24-авг. — Sputnik. АКШнын Кыргызстандагы жаңы элчиси Шейла Гуолтни ант бергени элчиликтин Facebook тармагындагы баракчасында айтылат.
Августтун башында АКШ сенаты бир жыл мурун президент Барак Обама тарабынан сунушталган Гуолтнинин талапкерлигин колдоп берген.
Февралда Шейла Гуолтниге карата Кыргызстандын Тышкы иштер министрлиги агреман берүүдөн баш тартканы боюнча маалымат ЖМКларга чыккан. Бирок министрлик бул маалыматты ошол эле күнү төгүндөгөн.
Шейла Гуолтни 1999-2001-жылдары АКШнын Кыргызстандагы элчилигинде жооптуу кызматтарды ээлеген. Үч континенттеги беш мамлекетте 25-жылдан ашык иштеген.
Ошондой эле Россияда алты жыл иштеп, АКШнын Санкт-Петербургдагы башкы консулу болгон. Кийин Москвадагы элчинин жардамчылык милдетин аркалаган. 2014-жылдын февраль айынын соңунда Россияга каршы санкциялар башталганда, ал АКШнын Россиядагы убактылуу элчиси болуп иштеген.
