БИШКЕК, 6-авг. — Sputnik. Америка Кошмо Штаттарынын сенаты АКШнын Кыргызстандагы элчисине Шейла Гуолтнинин талапкерлигин колдогонун Мамлекеттик департамент Twitterдеги расмий баракчасына жарыялады.
Буга чейинки элчи Памела Спратлендин дипломатиялык миссиясы 2014-жылдын соңунда аяктап, ал АКШнын Өзбекстандагы элчиси болуп дайындалган. Февралда АКШнын Кыргызстандагы убактылуу элчигине Ричард Майлзды жиберген.
— State_SCA (@State_SCA) 5-август, 2015
АКШ президенти Барак Обама Гуолтнинин талапкерлигин кароону сенатка 2014-жылдын августунда эле жөнөткөн.
Шейла Гуолтни 1999-2001-жылдары АКШнын Кыргызстандагы элчилигинде жооптуу кызматтарды ээлеген. үч континенттеги беш мамлекетте 25-жылдан ашык иштеген.
Ошондой эле Россияда алты жыл иштеп, АКШнын Санкт-Петербургдагы башкы консулу болгон. Кийин Москвадагы элчинин жардамчысы милдетин аркалаган. 2014-жылдын февраль айынын соңунда Россияга каршы санкциялар башталганда, ал АКШнын Россиядагы убактылуу элчиси болуп иштеген.
