БИШКЕК, 19-авг. — Sputnik. Кыргызстанда англис тили мугалимдери үчүн мыкты сапаттагы кошумча методикалык жана окуу материалдары бериле турганын Билим берүү жана илим министри Элвира Сариева билдирди.
Сариева учурда "Кыргызтесттин" алты деңгээли ишке киргенин, ушундай эле иш орус тили боюнча да жүргүзүлүп жатканын маалымдады.
"Министрликтин жумушчу тобу британиялык кеңеш менен кызматташуунун негизинде бардык курактагы жарандар үчүн биздин программага ылайык келген англис тилин үйрөнүү боюнча окуу материалдарын тандап алды. Эми 3-11-класстын мугалимдери мыкты сапаттагы окутуу материалдарын акысыз пайдалана алышат", — деди министр.
Сариева аталган методикалык материалдардын негизинде англис тили окуу, жазуу, аудио аркылуу үйрөтүлө турганын кошумчалады. Анын айтымында, мугалимдер үчүн атайы колдонмолор текшерүүдөн кийин кеңири пайдалануу үчүн Билим берүү министрлигинин сайтына жайгаштырылат.
