БИШКЕК, 17-авг. — Sputnik. Астанадагы мигранттарды колдоо борборунда кыргыз улутундагыларга эне тилин үйрөтүү боюнча кечки мектептер үчүн окуу китепинин бет ачары өттү. Бул туурасында "Замандаш" ассоциациясынан билдирдишти.
"Кыргызстан-Астана" улуттук маданий бирикмесинин төрагасы Шавкат Исмаиловдун айтымында, аталган окуу куралын түзүүгө Кыргызстан менен Казакстандын президенттери көмөк көрсөткөн. талкууларга КРдин президентинин алдындагы Мамлекеттик тил боюнча улуттук комиссиянын өкүлдөрү катышкан.
"Китептин авторлору Перизат Осмонова (Кыргызстан) жана Жумагүл Турлыбекова (Казакстан) иш учурунда эки өлкөнүн ири окумуштууларынан, Казакстан элдеринин Ассамблеясынан кеп-кеңештерди алып иштеди", — деди ал.
Жаңы-усулдук комплекс эки китептен жана бир дептерден турат. Буга мугалимдин усулдук колдонмосу тиркелген. Кыргыз филологиясы менен катар эле Казакстандын тарыхы жана маданияты боюнча маалымат берген бөлүмдөр бар.
Андан сырткары, 4,5 миң нускада чыккан китепте тил үйрөтүүдө эки элдин тилинин окшоштуктары да пайдаланылган.
"Казакстанда 4,5 миңге жакын кыргыз окуучулары бар. 2015-жылы Казакстандын шаарларында төрт кечки мектепти ачуу пландалган. Ал эми 2016-жылы Кыргызстандын тарыхы, кыргыз тили боюнча аудио жана видео колдонмолор чыкмакчы", — деди Исмаилов.
Ал чет жактагы кыргыз диаспораларын Астана шаарына чогултуп, кечки мектептерди иштетүү жана кыргыз тили менен маданиятын балдар арасында терең жайылтуу боюнча ыкмаларды талкуулоону сунуштады.
