БИШКЕК, 17-авг. — Sputnik. Жекшемби күнү "Ата Мекен" саясий партиясы күздөгү парламенттик шайлоого катыша турган 100 талапкердин алдын ала тизмесин жарыя кылды.
Партия тизмесин Өмүрбек Текебаев жетектейт. Биринчи ондуктун тизмеси төмөнкүдөй.
- Өмүрбек Текебаев, ЖК депутаты;
- Садык Шер-Нияз, кинорежиссер;
- Мелис Мырзакматов, Оштун соттолуп кеткен мурдагы мэри;
- Аида Салянова, экс-башкы прокурор;
- Наталья Никитенко, ЖК депутаты;
- Жоомарт Оторбаев, экс-премьер-министр;
- Жоомарт Сапарбаев, ЖК депутаты;
- Бахадыр Сулейманов, ЖКга 2010-жылы "Ата-Журттан" депутат болуп келген;
- Айсулуу Мамашева, "Дасмия" этнокомплексинин жетекчиси, Турусбек Мамашевдин кызы;
- Сайдулла Нышанов, ЖК депутаты.
Бул партиянын алдын ала берилген тизмесине, бир тууган Шерниязовдор депутат болууга ат салышмакчы. Андан сырткары кинорежиссер Садык Шернияздын кесиптеши, өзү түптөгөн "Айтыш фильм" киностудиясынын директору, КТРКнын байкоочу кеңешинин мүчөсү Фархат Бекманбетов 39-тизмеде турат.
Ал эми Эсептөө палатасынын мурдагы жетекчиси, президенттик аппараттын мурдагы жетекчиси, маркум Медет Садыркуловдун жакын досу Искендер Гаипкулов 16-сапка келди.
11-болуп мурдагы Адилет министри Алмамбет Шыкмаматов турат. Ал президенттик аппараттын ошол кездеги жетекчиси Данияр Нарымбаев менен болгон чатактан улам, андан кечирим сурабай тургандыгын айтып кызматынан кеткен. Парламенттин вице-спикери Асия Сасыкбаева 13-орунда, ал эми "Ар-Намыстан" өткөн депутат Каныбек Иманалиев 15-сапта.
Конституциялык палатанын соту, биометрика боюнча айткан пикиринин айынан чыр менен кызматтан кеткен Клара Сооронкулова 29-орунда келди.
КСДПчы Эркингүл Иманкожоева эми "Ата Мекенге" келип, 33-тизмеге турду.
Парламенттик шайлоо 2015-жылдын 4-октябрына белгиленген. БШКнын жумушчу тобунун жетекчиси Канатбек Азиздин айтымында, 25-августка чейин саясий партиялардын баары БШКга өздөрүнүн талапкерлеринин тизмесин бериши керек.
