БИШКЕК, 22-июль — Sputnik. Вице-премьер-министр Абдырахман Маматалиев Финансы полициясынын жылдын биринчи жарымынын жыйынтыгы боюнча өткөрүлгөн коллегия жыйынында мекеменин ишин сынга алганын өкмөттүн маалымат кызматы билдирет.
Маматалиев мисал катары иликтөө иштеринин жыйынтыгы боюнча зыяндын ордун толтуруу иштери начар жүргүзүлүп жатканын келтирди.
"Аныкталган 774 миллион 297 миң сомдун 401,3 миллиону гана мамлекеттин казынасына кайтарылган. Мындан тышкары, казыначылык органдары тарабынан бюджетке 319 миллион сомдон ашуун акча түшкөн", — деди чиновник.
Маматалиев жарым жылдын жыйынтыгы аталган мекеменин начар ишин көрсөткөнүн белгиледи.
"Бүгүнкү күндө калктын Финансы полициясына болгон ишеними төмөндөп кетти. 10 күндүн ичинде 6 кызматкердин кармалышы тарбиялык иштердин начар жүргөндүгүн далилдейт. Кылмышка тиешеси бар экени аныкталса, ал адам ээлеген кызматына карабай жоопкерчиликке тартылат", — деди вице-премьер.
Маматалиев мекеме жетекчилигине жеке курамдын ичинде моралдык-психологиялык маанайды калыбына келтирүү, коррупцияга каршы күрөштү күчөтүү тапшырмасын берди.
