Табалды Эгембердиевдин үй-бүлөсү кыргыз элине ыраазычылык билдирди

БИШКЕК, 30-июнь — Sputnik. Белгилүү коомдук ишмер, айтылуу "Шоро" компаниясынын, "Супара" этнокомплексинин негиздөөчүсү Табылды Эгембердиевдин үй-бүлөсү ал каза болгон учурда колдоо көрсөткөн кыргыз элине ыраазычылык айткан билдирүү таратты.

Бүгүн Эгембердиевдин өлгөнүнө кырк күн болду. 

"Оор кайгыдан арылбай, жоготуунун азабын тартып, жан кыйналып турган ушул күндөрү кулунунан айрылып боздоп калган энесине, өмүрлүк жарынан айрылып кан какшап турган жубайына, маңдайынан сылап турган атасынан ажырап, айлалары түгөнүп сыздап турган балдарына акыл-кеңешин айтып, ой-максаттарына канат-бутак болгон бир туугандарына, ар дайым үмүт-тилектерине арка-бел болгон жакындарына, кайрат айтып, кайгыбызды жеңилдетип, ыза-муңубузду тең бөлүшкөн эл-журтубузга терең ыраазычылык билдиребиз", — деп айтылат кайрылууда.

Маркумдун үй-бүлөсү Эгембердиев тууралуу айтылып-жазылгандар көңүл жылытып, көз жашты басып, көксөө суутканга жардам бергенин белгилейт.

"Атам өлсө өлсүн, атамды көргөн өлбөсүн" деген элдин сөзүн эстедик. Атабыздын артында эл үчүн жасаган көптөгөн иштери калганын билдик. Ал элдин уулу болуптур", — дейт маркумдун үй-бүлөсү.

Кайрылууда Эгембердиевдин жасап үлгүрбөй калган иштерин балдары уланта турганы айтылат.

Белгилүү коомдук ишмер, айтылуу "Шоро" компаниясынын, "Супара" этнокомплексинин негиздөөчүсү, публицист Табылды Эгембердиев 16-апрель күнү узакка созулган оорудан улам 64 жашында каза болгон.