БИШКЕК, 8-июнь — Sputnik. Ош облусунун Кара-Суу районунда 2010-жылдын июнь айындагы улуттар аралык чыр-чатакта өз милдетин аткарып жатып каза болгон милиция кызматкерлери эскерилди. Бул туурасында ИИМдин Ош шаардык жана облустук башкы башкармалыгынын басма сөз кызматы маалымадады.
Ага Ички иштер министринин орун басары Курсан Асанов, ИИМдин Ош шаары жана Ош облусу боюнча башкы башкармалыгынын башчысы Сүйүн Өмүрзаков, жергиликтүү бийлик өкүлдөрү жана каза болгон милиция кызматкерлеринин жакындары катышты
"Июнь окуясында каза тапкан милициялар баатырларча курман болгону жана эрдиктери түбөлүк эсте калат", — деди Асанов.
Июнь окуясында каза тапкан кызматкерлер, милициянын майору Ибрагим Кулбаевди эскерүү туулуп өскөн айлында маркумдун атын алып жүргөн мектепте өттү.
Кара-Суу РИИБдин башчысы Адылбек Султанов жана анын айдоочусу Уран Шамурзаевди эскерүү митинг-реквиеми Кара-Суу райондук Ички иштер башкармалыгынын имаратында маркум Адылбек Султановдун эстелигинин алдында болду.
Султановдун жана анын айдоочусу Уран Шамурзаевдин арбагына багышталып Куран түшүрүлгөн соң эскерүүгө келген кесиптештери жана Жогорку Кенештин депутаттары, ИИМдин орун басары Асанов жана милиция кызматкерлеринин жесир калган жубайлары сөз сүйлөп, эстеликтерге гүл чамбарлар коюлду.
2010-жылдагы июнь окуясында милициянын 10 кызматкери каза тапкан.
