БИШКЕК, 15-май — Sputnik. Өз милдетин аткарып жатып курман болгон милициянын 31 кызматкеринин ысымын эстелик тактага жазуу менен түбөлүккө калтырышты деп билдирет борбор калаанын Ички иштер башкы башкармалыгынын маалымат кызматы.
Иш-чарага ички иштер министри, милициянын генерал-майору Мелис Турганбаев, Бишкектин мэри Кубанычбек Кулматов, шаардык кеңештин төрагасы Марат Аманкулов жана башкалар чакырылган.
Эскерүүдө Турганбаев бул окуянын борбор калаадагы бүтүндөй милиция кызматы үчүн зор мааниге ээ экендигин белгиледи.
"Бул өз милдетине жана мекенине өмүрүн аябай кызмат кылган милиционерлердин эрдигине жана каармандыгына көрсөтүлгөн урмат, сый жана таазим", — деди Турганбаев.
Мемориал бир күндүк эмгек акысын которуп беришкен Бишкектин Ички иштер башкармалыгынын кызматкерлеринин каражатына орнотулду.
Каарман милиционерлердин биринин жубайы Светлана Сиренко бардык курман болгондорун жакын-туугандарынын атынан эстеликти орнотуу демилгечилерине жана борбор калаанын милициясынын жеке курамына ыраазылык билдирди.
"Адам аны эстегендер өлмөйүнчө жашай берет деген кеп бар. Силер кызмат өтөп жүрүп, жакындарыңар үйдө күтүп жатканын эсиңерден чыгарбагыла. Өзүңөргө сак болгула", — деди Сиренко.
Курман болгон кызматкерлерди эскерип, аза күтүү мүнөтү болуп, кесиптештери асманга ок атышты.
Салтанаттын аягында ШИИБдин жеке курамы эстеликке гүл коюп, салтанаттуу марш менен анын алдынан өттү.
