БИШКЕК, 8-июнь — Sputnik. Жекшемби күнү Түркияда өткөн парламенттик шайлоонун расмий жыйынтыктары 10-11 күндөн кийин чыга турганын Жогорку шайлоо кеңешинин башчысы Сади Гүвен журналисттерге билдирди.
Бюллетендерди алдын ала 100 пайыз санагандан кийин 10 пайыздык чектен төрт партия өттү. Алар: Адилеттүүлүк жана өнүгүү партиясы (AKP), Республикалык эл партиясы (CHP), Улутчул аракет партиясы (MHP), Элдик демократия партиясы (HDP)".
"Комиссия бардык апелляцияларды карап, тийиштүү чечимдерди кабыл алган соң шайлоонун акыркы жыйынтыгы 10-11 күндөн кийин чыгат", — деди Гүвен.
10 пайыздык чектен өткөн партиялар парламенттен төмөндөгүдөй орундарды алышы мүмкүн. Адилеттүүлүк жана өнүгүү партиясы 254 орун, Республикалык эл партиясы (CPH) 132 орун, Улутчул аракет партиясы (MHP) 82 орун жана Элдик демократия партиясы (HDP) 78 орун алышы күтүлүүдө.
Түркияны учурда Адилет жана өнүгүү партиясы (AKP) башкарып келет.
Жекшемби күнү өткөн парламенттик шайлоого жалпысынан 21 партия катышкан.
