БИШКЕК, 4-июнь — Sputnik. Мамлекеттик салык кызматы бардык жарандарды салык төлөбөй, мыйзамсыз иштеп жаткан ишкерлерди көрүп-билип калса, кабарлап турууга чакырды. Бул туурасында Мамлекеттик салык кызматынын маалымат кызматы билдирүү таратты.
"Ар бир жаран жашаган, иштеген жерге жакын жайгашкан дүкөндөрдө, тигүү цехтеринде, кафе-ресторандарда жана турак-жайын ижарага берген субъектилердин, патент менен иштегендердин мыйзамсыз иш алып барган учурларын аныктоодо салык кызматына көмөк көрсөтө алат", — деп айтылат аталган кызмат тараткан билдирүүдө.
Мыйзамсыз иштегендер туурасында маалымат билдиребиз деген жарандар 0312 61 31 89 номери аркылуу "ишеним телефонуна", 194 номери боюнча Маалымат борборуна кайрыла алышат.
Маалымат кызматынан коомдун кеңири колдоосу менен гана бизнести көмүскөдөн чыгарууга, салыкты төлөөдөн баш тарткандарды төлөтүүгө болорун айтышты.
