БИШКЕК, 27-май — Sputnik. Жогорку Кеңештин төрагасы Асылбек Жээнбеков расмий иш сапар алкагында 26-майда Москва шаарында РФтин Федералдык Жыйынынын Мамлекеттик Думасынын төрагасы Сергей Нарышкин менен жолугуп, эки тараптуу кызматташтык жана парламент аралык өнөктөштүктү талкуулады. Жолугууда Нарышкин ЕАЭБ боюнча келишимдер ратификациясын жакын арада карап чыгууга аракет кылышаарын билдирди.
Төрага Жээнбеков Кыргызстан Евразия Экономикалык Биримдикке кошулуу тууралуу бардык процедуралардын аягына чыкканын айтып, биримдикке кошулуу боюнча документтерди РФ Мамдумасынан эртерээк ратификациядан өткөрүүгө чакырды. Кыргыз парламентинин жетекчиси бул тууралуу тиешелүү катты Нарышкинге тапшырды.
"Кыргызстандын жарандарынын Россия Федерациясынын аймагында жүрө турган мөөнөтүн узартуу, РФ аймагына кирүүнү чектөөнү алып салуу жагынан көмөк көрсөтүшүңүздү суранабыз. Ал эми чек ара бекеттерин жаңы шартка ыңгайлаштырыш үчүн 200 млн. доллардын бөлүнүшү маанилүү иш болду", — деди Жээнбеков.
Ал 1 млрд. долларлык капиталы бар эки тараптуу өнүктүрүү фондунун ишин жүзөгө ашыруу өтө орчундуу экенин кошумчалады.
Мамдума төрагасы Нарышкин ЕАЭБ боюнча келишимдер ратификациясын жакын арада карап чыгууга аракет болуп жатканын айтты.
"Биз дайыма Кыргызстанды колдойбуз. Кыргызстандын ЕАЭБге киришин кубануу менен кабыл алдык. ЕАЭБ боюнча келишимдерди ратификациялоону чукул арада карап чыгууга аракет кылабыз", — деди Мамдуманын төрагасы.
Нарышкин "Кыргызстан-Россия" өнүктүрүү фонду олуттуу долбоорлорду ишке киргизиши керек" деген оюн билдирди.
