БИШКЕК, 25-май — Sputnik. Бою эң узун кыргызстандык Жеңишбек Райымбековго Социалдык өнүктүрүү министрлигинен майыптар үчүн атайын коляска берилгенин ведомствонун маалымат кызматы билдирди.
Райымбеков Нарын облусунун Ак-Талаа райоунундагы Ак-Кыя айылынын тургуну. Зарыл болгон колясканы Социалдык өнүктүрүү министрлиги Кудайберген Базарбаев аталган айылга барып тапшырды. Анын айтымында, Райымбековдун буту ампутацияланганы туурасында маалымат келип түшөр замат, Республикалык протез жасоо жана ортопедиялык буюмдар мекемесине бейтапка майыптар үчүн коляска жасоо тапшырылган.
"Бою мынча узун майып адамдар үчүн коляска КРде эле эмес, башка өлкөлөрдө да чыгарылбай турганын белгилей кетүү керек. Биздин кызматкерлер Россияга, Кытайга кайрылып, бирок аларда мындай чоң коляска болбой турганын жооп кылышкан. Ошондуктан колясканы өзүбүздө даярдоону чечкенбиз", — дейт министр.
Республикалык протез жасоо жана ортопедиялык буюмдар мекемесинин директору Утан Жунушов колясканы даярдоо боюнча абалдан кандайча чыккандыктары туурасында айтып берди.
"Колясканы биздин мекемеде колдо бар материалдар менен полуфабрикаттардан чогултуп жасоону чечтик. Керектүү өлчөмдөрдү өзүбүз аныктап, жабдыкка канча күч келерин эсептеп, ылайыктуу тетиктерин тандап алдык. Андан соң биздин темир уста-чогултуучулар ири көлөмдөгү колясканы жасоого киришти", — дейт Жунушов.
Базарбаев, ошондой эле, Райымбеков мурда Социалдык өнүктүрүү минстрлигинин реабилитациялоо борборунда дарыланганын белгиледи. Ошондон кийин Израилдин элчилиги бою эң узун кыргызстандыкты аталган өлкөнүн алдыңкы ооруканаларынын биринде акысыз дарылоо маселесин чечип берген. Жол киреге кетчү жана дарылоого керек каражаттарды төлөп берүүгө даяр демөөрчүлөр да табылган. Бирок, аны чет өлкөгө жиберүүгө анын жакындары макул болгон эмес.
