Документ кагаз бетинде эле калбашы керек — Ниязалиева майыптардын укуктары жөнүндө

БИШКЕК, 19-май — Sputnik. Кыргызстандын вице-премьер-министри Дамира Ниязалиева майып адамдардын укуктары жөнүндө Конвенция иш жүзүндө аткарылып, ден соолугу жагынан мүмкүнчүлүгү чектелгендерге пайда алып келиши керек деп айтканын өкмөттүн маалымат кызматы билдирет.

Бишкекте дүйшөмбү күнү майып адамдардын укуктары жөнүндө Конвенцияны ратификациялоо жөнүндө тегерек стол өтүп, ага вице-премьер Ниязалиева катышты. Аталган документти БУУ 2006-жылдын 13-декабрында кабыл алган. 

Вице-премьердин айтымында, КР аткарышы керек болгон иш-чаралар боюнча алдын ала эсептөөлөрдү жүргүзө турган жумушчу топ түзүлдү. Башка өлкөлөрдүн, анын ичинде жакында эле документти ратификациялаган Казакстандын бул багыттагы иш тажрыйбасын иликтөө зарыл. 

"Биз документти жактырып, ага байланыштуу милдеттемелерди өзүбүзгө алып, анан каражаттын жокутугунан аларды аткара албай калбашыбыз керек. Анда документ эч пайда бербей, кагаз жүзүндө эле калат", — деди Ниязалиева. 

Ал мындай учурлар жок эместигин, ошон үчүн баарын таразалап, өз мүмкүнчүлүктөрдү эсептеп чыгып, анан гана акыркы чечимди кабыл алуу керектигин белгиледи.

БУУнун Башкы Ассамблеясы тарабынан 2006-жылдын 13-декабрында кабыл алынган майып адамдардын укуктары жөнүндө Конвенция адам укуктары боюнча негизги эл аралылык укуктук докменттердин акыркыларынын бири болуп эсептелет. Конвенция бардык майып адамдар пайдаланышы керек болгон укуктар кенен аныкталып, ошондой эле ал укуктардын ишке ашырылышын камсыз кылууда мамлекет менен башка тараптардын милдеттемелерин көрсөткөн. 

Кыргызстан аталган Конвенцияга 2011-жылдын 21-сентябрында кол койгон, бирок азырынча ал ратификациялана элек.

Расмий маалымат боюнча, Кыргызстанда 160 миңден ашык ден соолугу жагынан мүмкүнчүлүгү чектелген адамдар жашайт.