БИШКЕК, 15-май — Sputnik. Абдрахманов көчөсүнөн №7 троллейбустун артына жабышып алып бир канча аялдамага чейин барган өспүрүмдүн видеосу социалдык тармактарда жарыяланды.
Видеону тартып алган Бакыт Мукамбетовдун айтымында, бул окуя 12-май күнү болгон.
"Ал мындай ыкма менен бир канча жерге чейин барды. Мен анын кылыктарынын жарымын эле тартып калдым", — деди ал.
Өспүрүмдүн мындай аракетин Жол кайгуул кызматы бейбаштык катары баалап, аны мындай жоругу үчүн административдик жоопкерчиликке тартса боло турганын белгиледи.
"Троллейбустун айдоочусу күнөөлүү эмес. Троллейбус чоң жана жай жүрөт, өспүрүм анын артына жабышып алганын көрбөй калышы мүмкүн", — деп Бишкек шаардык Жол кайгуул кызматынын батальонунун командири Жээнбек Большевиков Sputnik сайтынын кабарчысына билдирди.
Ал ошондой эле, эгер Жол кайгуул кызматынын кызматкерлери аны көргөндө рация менен кийинки жол кайгуул кызматкерине айтып, троллейбусту токтотуп, бала менен сүйлөшмөк деп кошумчалады.
"Айдоочуларга мындай көйгөйлөр керек эмес, ал өспүрүмдү байкабай калышы ыктымал. Эгер бала жыгылып кетсе эмне болмок?", — деди Большевиков.
Бишкек шаардык Жол кайгуул кызматынын батальонунун командири өспүрүмдүн мындай кылыгын бейбаштык боюнча административдик жоопко тартса боло турганын баса белгиледи.
Бишкек шаардык троллейбус башкармалыгынын башчысы Геннадий Милицкий Sputnik сайтына билдиргендей, ал мындай көрүнүшкө биринчи жолу туш болуп жатат.
"Мен бул жаңылыкка абдан таң калдым. Эгер ал түшүп калса эмне болмок? Ага сөзсүз түрдө жаза бериш керек", — деди ал.
Милицикий бардык айдоочулар менен жолугуп, бул окуя тууралуу айта турганын белгиледи.
