Атамбаев, мүмкүн, РФ менен Батыштын ортосундагы байланыштыруучу болот — Сариев

БИШКЕК, 20-мар — Sputnik. "Далил плюс" эксперттик клубунун талдоочусу Марс Сариев президент Алмазбек Атамбаевдин Европалык биримдикке кирүүчү өлкөлөргө барышы Россия үчүн олуттуу мааниге ээ жана ал расмий максаттардан тышкары Владимир Путиндин элчиси милдетин да аткарышы ыктымал деп эсептейт.

— Европага сапар тартууда Атамбаев эмне максаттарды көздөйт?

— Жакында эле Кыргызстандын Белоруссия тарапка жасаган кайрылууларынан кийин АКШнын элчиси Ричард Майлз мамлекет башчысына Барак Обаманын жеке чакыруусун тапшырган эле.

Алмамбет Анапияевдин өлүмүнө байланышкан окуя жана анын аркасынан болгон Бакиевдерди өткөрүп берүү боюнча анча жагымсыз ноталар менен өз ара алмашуулар батыш өлкөлөрдүн көңүлүн дароо өзүнө бурду. Эсиңерде болсо, Европа мамлекеттеринин жана Израилдин элчилери Белорруссиянын Тышкы иштер министрлигине жиберген нотада билдирилген КРдин көз карашын колдогон.

Албетте Кыргызстан ЕАЭБга кирип жатканын эске алганда, аларга мындай мамиле кызыктуу болду. Себеби ал процессти кандайдыр бир бөлүп-жарып, анан калса, Александр Лукашенконун абалын дагы бир жолу солгундатууга мүмкнүдүк берет. Алар баш тартууга кыйын боло турган сунуштарды жасашы мүмкүн жана алар бизди ар кандай "бал-каймактар" менен да азгырууга даяр.

Болгондо да чакыруулар эң кызыктуу өлкөлөрдөн — Германиядан, Франциядан, Швейцариядан, Австриядан жана Бельгиядан — Европа биримдигинин өзөгүн түзүп турган жана эл аралык олигархат отурган мамлекеттерден болуп жаткандыгын байкаңыз. 

Бирок, экинчи жагынан, Европа биримдигине сапарын баштар алдында президент Санкт-Петербургга барып Россия Федерациясынын башчысына жолуккандыгын да эске алыш керек.

Россияга барышы Кыргызстан үчүн эл аралык деңгээлде жакшы пиар болду. Путин "жоголуп кетип" кайра Атамбаев менен жолугушуу аркылуу пайда болушу биздин республиканын таанылышына жакшы таасир кылды. 

Ал эми ага чейин Атамбаев Молдовага расмий эмес сапар тартып келиши, чынын айтканда, ал өлкөнүн жетекчилиги менен "сепараттык" сүйлөшүүлөрү РФтин сыпайы өтүнүчтөрүн билдирүү менен ортомчулук милдетти аткарды деген ойго түртөт. 

Молдовада да азыр Украинага окшогон айрым бир процесстер башталууда. Себеби Батыштын планында аны Румынияга кошуу планы бар да, бул болсо Россияга өтө катуу тиет. 

Маселени ушул жагынан алганда, Атамбаевдин ЕБ өлкөлөрүнө жасаган сапарлары, Европа жетекчилерине жеке билдирүүлөрдү берүү үчүн пайдаланылат көрүнөт. Кыязы, Украина жана Молдова маселелери боюнча кандайдыр бир кабар жиберилет.

Европага жана, мүмкүн, Америкага барар алдындагы Невадагы жолугушуу, мүмкүн, Россия үчүн маанилүү жана анда Атамбаев өзүнчө бир Путиндин элчиси катары болушу да ыктымал. Болбосо кайсы бир алигархтын жеке учагына түшүп бир жакка барып, коомдун кыжырына тийүүнүн президентке кереги эмне. Бул факт ал Молдовада Путиндин олуттуу бир тапшырмасын аткарганын ырастагансыйт.

Себеби оппозиция дароо эле жандана түшүп, ага шектүү бир максаттар менен "Европада чапкылап жүрөт" деп жаман аны атка кондура коюшту. Оппозициялык күчтөр, кыязы, глобалдуу геосаясий маселелерди чечүүнү айрым адамдардын майда кызыкчылыктарына аралаштырбоо керектигин түшүнбөгөн сыяктанат.