БИШКЕК, 18-мар. — Sputnik. Чет жактагы кыргыз диаспораларынын "Замандаш" ассоциация миграциялык саясат боюнча өкмөт ишин күчтөндүрүшү керектигин сунуштап жатат.
Ассоциациядан билдиришкендей, миграциялык саясат боюнча негиз болот турчу документ жок, же ал иштелип чыгууда. Тармактык мамлекеттик органдардын белгилүү мөөнөт ичинде жасай турган иштеринин так долбоору жок.
"Чет жакта жашап жаткан мекендештер ортосундагы туруктуу жана бекем байланышты түзүп, диаспорлар менен өкмөттүн өз ара кызматташтыгын жакшыртуу үчүн мамлекеттик деңгээлдеги программанын долбоору сунушталган", — деп айтылат билдирүүдө.
Мекеменин маалыматына ылайык, бул долбоорду иштеп чыгуу үчүн түзүлгөн ведомстволор аралык жумушчу топ аталган программаны толугу менен коомчулукка тааныштырган жок. Азыркыга чейин миграциялык саясат боюнча концепция кабыл алына элек.
Андан сырткары мамлекеттик программанын алкагында бейөкмөт уюмдар менен мекендештердин байланышын чыңдоо боюнча кеңеш түзүү сунушталган. Өкмөт аппаратынын социалдык өнүгүү бөлүмүндө кеңештин жана долбоордун жобосу иштелип чыгууда. Ал министрликтер менен ведомстволорго макулдашуу үчүн жөнөтүлгөн. Бирок, кеңешти түзүү аракети алдыга жылбай, аталган маселе боюнча маалыматтар жок, деп билдирди ассоциация.
"Миграциялык саясат боюнча кандайдыр бир документтерди кабыл албай туруп, эл аралык өнөктөштөр менен чет жакта жашап жаткан мекендештердин укугун коргоо боюнча сөз кылууга болбойт", — дейт "Замандаш".
Өкмөттүн маалымат кызматы Sputnik сайтынын кабарчысына миграциялык саясат боюнча кайрылуулар жана долбоор боюнча маалыматты жакын арада бере тургандыктарын айтты.
