БИШКЕК, 19-янв — Sputnik. Социалдык маселелер боюнча вице-премьер-министр Дамира Ниязалиева Кыргызстанда педофилдерди химиялык жол менен бычуу ыкмасы киргизилүүсү мүмкүндүгүн маалымат жыйында билдирди.
Буга чейин социалдык тармактын колдонуучулары балдарды кордогондордун жоопкерчилигин күчөтүп, аларды химиялык жол менен бычуу керектигин президент менен депутаттардан суранышкан. Мындай кайрылууга алар кол коюшкан.
Ниязалиеванын айтымында, өлкөдө балдарды коргоого багытталган нормативдик-укуктук актылар бар.
"Ар бир жаран мындай кайрылууга кол коюуга укуктуу. Химиялык жол менен бычуу маселеси буга чейин да көтөрүлгөн, бирок, Саламаттыкты сактоо министрлиги каршы болгон. Мындай процедура үчүн бюджеттен өтө чоң каражат керек. Акыркы болгон окуялардан улам химиялык жол менен бычууну киргизүү бизге зарыл болушу ыктымал. Балким, кордоочулар арты эмне болорун билип туруп мындай иштерге барбай калышы мүмкүн", — деди вице-премьер.
Ал ошондой эле, анын мындай пикири коомчулуктун ою менен дал келип жатканын кошумчалады.
"Менин пикирим – мен химиялык жол менен бычууну колдойм. Айыпсыз коомдун кичинекей жарандарына мындай мамиле жасалбаш керек", — деди Ниязалиева.
Жогорку Кеңешке педофилдерди химиялык жол менен бычуу жөнүндөгү мыйзам долбоору демилгеленди. Алгачкы жолу 2013-жылы бул мыйзам долбоору Жогорку Кеңеш тарабынан кабыл алынган, бирок, мамлекет башчынын каршылыгы менен ал артка кайтарылган.
