БИШКЕК, 19-янв — Sputnik. Голландиянын делегациясы россиялык делегациянын ыйгарым укуктарын дагы бир жылга алып коюу боюнча өзүнүн резолюция долбоорун сунуштады деп билдирет РИА Новости "Известия" гезитине таянуу менен.
Мамлекеттик Думанын Эл аралык комитет башчысынын орун басары Леонид Калашников Россиянын укуктары кайтарылып берилбейт деп эсептейт.
2014-жылдын апрелинде Украинадагы кырдаалга байланыштуу Европа кеңешинин парламенттик ассамблеясындагы россиялык делегацияны добуш берүү укугунан, ошондой эле ассамблеянын уставдык органдарынын отурумдары менен байкоочулук аракеттерине катышуу мүмкүнчүлүгүнөн ажыратышкан. Делегация отурум жүрүүчү залдан ыйгарым укуктары кайра берилгенге чейин эле кеткен. Кышкы сессияда бардык делегациялардын ыйгарым укуктары кайра калыбына келтирилет.
ЕКПАнын төрайымы Анна Брассер РИА Новостиге "россиялык делегация, кыязы, добуш берүү укугун кайра алат" деп билдирген.
"Азыр ЕКПАнын, анын комитеттеринин айрым жетекчилери Киевде. Алар кандай болсо да кырдаалды түшүнүп, январда РФтин делегациясы менен эмне кылууну чечүүгө аракет кылып жатышат. Бирок украиналыктар Россиянын укуктарын жарым-жартылай да кайтарып берилишине каршы чыгууда. ЕКПАнын депутаты катары, мен биздин укуктар кайтарып берилбейт деп ойлойм", — деген Калашниковдун сөздөрүн келтирет басылма.
Голландиянын долбоору эки вариантты: ыйгарым укуктарынан жарым-жартылай же толук ажыратууну сунуштайт. Калашниковдун пикири боюнча, укуктары жарым-жартылай кайтарып берилгенде да, Россиянын ЕКПАнын ишине катышпоо жөнүндө оюн эске алганда, россиялыктарды бардык ыйгарым укуктарынан ажыратышпайт.
Россиялык делегациянын дагы бир мүчөсү Василий Лихачев кырдаал "чынында эле жагымсыз" жана анда "субъективдүүлүк көп" деп эсептейт. Делегациянын дагы бир мүчөсү сенатор Игорь Морозов ЕКПАдагы Американы жактоочулук маанайдагы күчтөр РФтин ыйгарым укуктарын чектөө үчүн колунан келгендин баарын жасайт деп эсептейт. Ал Россия өз ыйгарым укуктары толук калыбына келтирилгенде гана ассамблеяда иштөөгө даяр экендигин кошумчалады.
