Бишкекте "Бош кетпей, ала кет" социалдык долбоору башталды

Жазылуу
"Бош кетпей, ала кет" социалдык долбоорунун максаты – тургундардын шаар ичинде бара турган жерине оңой жана арзан жетип алуусун камсыздоо болуп эсептелет.

БИШКЕК, 9-дек — Sputnik. Борбор калаада "Бош кетпей, ала кет" социалдык долбоору башталды. Долбоордун максаты — шаар тургундарын жана конокторун бара турган жерине жолдон ала кетүү. "Көчмөн" коомдук уюмунун жетекчиси Улан Үсөйүн биздин кабарчыга билдиргендей, бул ыкма өнүккөн мамлекеттерде көптөн бери колдонулуп келет. 

"Мындай долбоорлор коңшу Казакстанда аябай жакшы өнүккөн. Биз да мындай жакшы ишти Кыргызстанда жайылтууну максат кылып жатабыз. Азыр эшикте суук. Аялдамаларда автобуста же микроавтобустарда күтүп турган жарандар көп. Биз бул жарандардын бара турган жерине оңой жана арзан жетип алуусуна шарт түзүп берели дедик. Учурда биздин долбоорду колдогондор көп", — дейт ал.

Улан Үсөйүн бул долбоорго катышып жаткан айдоочулар жол кирени 20 сомдон ашырбайт деген үмүтү бар экенин кошумчалады.

"Долбоорго катышып аткан жарандар унаасынын терезесине алыстан эле көрүнчү жашыл түстөгү жабыштыргыч чаптап алышы керек. Ал эми жүргүнчүлөр баш бармагын өйдө көтөрүп, мындай унааларды тоссо болот. Айдоочу бармагын өйдө кылып жол тоскондор сапарлаш жүргүнчү экенин билишет", — дейт ал.

Андан сырткары, бул долбоор аркылуу жарандардын бир-бирине сый мамиле кылуусун жайылтууну максат кылып жатышкандыктарын Улан Үсөйүн баса белгиледи.


Жаңылыктар түрмөгү
0