Келсе коон союп майрамдайбыз! Арабдарга гол киргизген Турсуналинин жакындары. Видео

Жазылуу
Турсунали Рустамовдун Азия кубогунда жылдызы жанып, Бириккен Араб Эмирлигинин (БАЭ) командасына Мирлан Мурзаевден кийин экинчи голду киргизген.

Sputnik Кыргызстан маалымат агенттигинин кабарчысы Турсунали Рустамовдун жакындары менен маектешүү үчүн Кара-Балта шаарына барып келди. 

Агасы Юсуп Кадыров футболчунун ата-энесинин оюндан кийинки сезимдери жана жаңы төрөлгөн кызы тууралуу айтып берди. 

"Турсунали гол киргизгенде атасы толкундангандан өзүн кармай албай калды. Үйдү кыйкырык-сүрөөн каптады. Келсе коон союп майрамдайбыз деп отурат. Апасы ыйлады. Эки айдан бери Турсуналини күтүп жатабыз. Ал арада үчүнчү перзенти жарыкка келди. Кызы бир айдан өтүп калды. Буга чейин уулу жана дагы бир кызы бар болчу", — деди Кадыров.

Ал эми атасы Хайитмухаммед Рустамов уулунун спортко кантип келип калганын жана хоббиси тууралуу айтып берди.

"Өзүм жаш кезде футбол ойноп жүргөм. Турсунали мени ээрчип ойноп жүрчү. Кара-Балтадагы Сергей аттуу машыктыруучуга 3-классынан тарта бергем. Бой тартканда курама командага кошулду. Азырынча чет элдик клубдарда күчүн сынай элек. Бош убактысында иниси менен унаа оңдогонду жактырат. Үйдүн сыртына ага арнап кичи оюн талаасын жасап бергенбиз. Чыга калып эле топ тээп буттарын көндүрүп турат", — деди Рустамов.

Кыргызстан командасынын чабуулчусу Мирлан Мурзаев - Sputnik Кыргызстан
Добуш берели! Мирлан Мурзаев Азия кубогундагы "мыкты голдун" ээси болушу мүмкүн
Ал кошумчалагандай, Рустамовдордун үй-бүлөсү 90-жылдары Тажикстандан Кыргызстанга көчүп келишкен. Өзү базарда жер-жемиш сатат, жубайы Матлюба Рустамова үй кожойкеси. Төрт баласы бар. Турсунали үйдүн улуусу, андан кийин кызы жана уулдары бар.

Эске сала кетсек, Азия кубогунун 1/8 финалында Кыргызстандын футболчулары БАЭ менен беттешип, 3:2 эсебинде утулган. Атаандаштарга алгачкы голду Мирлан Мурзаев киргизсе, кийинкиси Турсунали Рустамовго таандык болду.

Жаңылыктар түрмөгү
0