02:31 20 Аяк оона 2017
Түз эфир
Видео

Буту жок бала футбол ойноп интернетти жарды. Таланттуу Азистин тарыхы

Кыскача шилтеме алуу
Таалайгүл Усенбаева
331650
© Sputnik / Эмиль Садыров

Жакында эле социалдык тармактарга бир буту жок, таяк таянган жаш бала топту жерге түшүрбөй ойноп жаткан видео тарап, көпчүлүктүн көңүлүн өзүнө бурду.

Дал ушул майып футболчу баланы Sputnik Кыргызстан агенттигинин кабарчысы таап ал тууралуу кызыктуу сюжет жасоону туура көрдү. Баланын аты Азис Давранов экен.

Азистин апасы менен сүйлөшсөк "Арча-Бешик конушунда турабыз" деп калды. Аталган конушка барып жолду таппай жүрсөк Азис агасы менен алдыбыздан тосуп чыкты. Бир көргөндө эле маңдайы жарык, кичипейил бала экенин байкадык. Үйгө жеткиче атасы майда-чүйдө буйрутма менен курулуш тармагында иштээрин, апасы балдарын карап үйдө экенин айтып келди. Ал эми Азистин апасы Венера Давранова баласы 7 жашка чейин дени-карды соо экенин, бирок 1-класска бараарына 20 күн калганда экөө жол кырсыгына кабылганын айтып берди.

"Бир күнү баламды ээрчитип алып жумушка бара жаткам. Бах менен Түштүк Магистраль көчөлөрүнүн кесилишиндеги аялдамада турсак, катуу ылдамдыкта келе жаткан маршрутка келип баарыбызды сүзүп кетти. Көзүмдү ачып карасам жанымда балам жок, ары жакка ыргып, эти эле кармап турбаса бир буту жулунуп кетиптир. Ооруканадан дарыгерлер анын бутун операция жолу менен алып салыш керектигин, болбосо балабыздын өмүрүн сактап кала албай тургандыктарын айтышты. Баарына макул болдук. Ошондон улам балама жасалма бут салышты", — деди Азистин апасы.

Азыр Азис 6-класста окуйт. Мектепке бараарда жасалма бутун кийип алат. Бирок аны кечке кийип жүрө албайт. Эң көп дегенде 4-5 саатка такса болот экен. Азис бир бутум жок деп эч качан маанайын түшүрбөйт, тескерисинче ата-энесине күч-кубат берип, алдыга койгон максаттарына талпынып келет.

"Мен мектепке барганда да, балдар менен топ ойноп жүргөндө да бир бутум жок деп кейибейм, кемсинбейм. Азыртадан жакшы окуп, чоңойгондо тасма тарткан режиссер болсом дейм. Мындан тышкары, кайрымдуулук фонд ачып балдарга жардам бергим келет. И баса, чоң кафе ачып байкемди ал жакка ашпозчу кылам. Анткени ал ушул кесипке кызыгып жүрөт", — деди Азис.

Азисти мектепке байкеси Элдар жетелеп барат. Ал инисин дайыма жанынан чыгарбай сүйөп-таяп турган тоосу. Футболго да байкеси аркылуу кызыгып калып, эми экөө тең көчөсүндөгү мыкты оюнчулардын катарында.

Тема боюнча

Колу жок "ноокендик программист". Устат, жакшы адис жана эненин сыймыгы
Жашоо үчүн күрөш: 17 ирет операция жасалган кыз кантип акча таба баштады
Каракол шаарындагы такси кызматына майыптар дагы иштеп жатат
Белгилер:
майып, бала, Футбол, Кыргызстан

Дагы видео

ЭҢ МААНИЛҮҮ