Алыскы Ат-Башы районунун Казыбек айылынын тургуну 18 жаштагы Бейшебай Талантбек уулу эки колу жок төрөлгөн. Майыптыгына карабай аны ата-энеси айылдагы мектепте окутуп, учурда 10-11-класстын базасын шаардагы колледжде улантууда.
Бейшебайдын чоң энеси Ракыя Жусубалиеванын айтымында, Бейшебай өзү төрт бир тууган. Андан башкаларынын баарынын дени-карды соо, жакшы эле төрөлүшкөн.
Учурда Бейшебай Бишкек шаарында чоң эне, чоң атасынын колунда турат. Келечекте ал музыка мугалими же программист болууну самайт.
"Кичинемде бутум менен сүрөт тартчумун, кийин талантым ырчылык жакка ооп кетти окшойт. Ыр, музыка жан дүйнөмө жакын болуп калды. Мектептеги иш-чараларда ырдап жүрдүм, ар кандай фестивалдарга катышып калам. Чоң сахнага чыксам деп кыялданчумун, бирок менин сырткы келбетим сахнага туура келбейт экен. Ага карабай кийин өзүмө окшогон балдарды тарбиялап, музыка сабагынан мугалим болсом деп кыялданам", — деди Бейшебай.
Эч кимге көз каранды болгусу келбегенин айткан Бейшебай катардагы адамдардай үй-бүлө күтүп, өзүнчө түтүн булатып кетсем деген тилек менен жашап келет.
