БИШКЕК, 24-июн. — Sputnik. Жаштар иши, дене тарбия жана спорт агенттиги өлкөдөгү спорттук мектептердин маалымат базасын иштеп чыкты. Бул тууралуу аталган мекемеден билдиришти.
Маалыматтык база агенттиктин сайтындагы (www.sport.gov.kg) "Спорттук мектептердин маалымат базасы" бөлүмүндө жайгаштырылып, Бишкек менен Ош шаарлары жана облустар боюнча маалыматтарды камтыйт.
Мамлекеттик агенттиктин директору Канат Аманкулов база коррупцияны алдын алып, ведомствонун ишин коомго ачык көрсөтүү максатында иштелип чыкканын белгилеген.
"Базаны түзүүгө негиз болду. Эми аны ар убак жаңылап туруш керек. Ар бир ата-эне сайтка кирип, баласын ким машыктырып жаткандыгын, тайпасында канча бала бар экенин көрсө болот. Ал эми уулун же кызын жаңыдан спортко берем деп шыктангандар базаны онлайн-маалымдама катары колдонуп, жайгашкан ордуна, спорттун түрлөрүнө жана башка критерийлерге карап, ылайыктуу мектеп тандай алышат", — деген Аманкулов.
Ар бир облустун жана шаарлардын бөлүмдөрүндө окутуучу-машыктыруучу курам жана машыккандардын саны инфографика түрүндө берилген.
База спорттук мектептер тууралуу толук маалыматты камтыйт:
- Спорттук мектептин статусу, дареги жана бюджети;
- Спорттун кайсы түрлөрү боюнча машыгуулар өтөт;
- Мектептин спорттук базасы;
- Административдик-башкаруу кызматкерлери;
- Машыктыруучулардын эмгек стажысы, билими, адистиги жана кызмат ордуна дайындалган датасы;
- Спортчулардын аты-жөнү жана туулган жылы;
- Сабактардын ырааттамасы жана башка маалыматтар.
Бишкек шаарына арналган бөлүмдө спорттун түрлөрү боюнча дирекциялар да кошулганы маалымдалды.
Маалымат базасы менен төмөнкү шилтеме аркылуу таанышууга болот.
