БИШКЕК, 8-сен. — Sputnik. Кыргызстандык UFC мушкери Валентина Шевченко чемпиондук кур үчүн Нико Монтано менен өтчү беттеш болбой калгандыгына таң калбаганын айтып чыкты.
АКШда жекшемби күнү өтчү беттеш Монтанонун ооруканага жатып калгандыгына байланыштуу болбой калды. UFC уюмунун дарыгерлери америкалык спортчунун саламаттыгын текшерип, анын бөйрөгүндө көйгөйлөр бар экендигин аныктаган.
Шевченко болсо өзүнүн Instagram баракчасына Монтано бир нече жолу беттештен качууга аракет жасаганын жазды.
"Менимче анын башында эле планы болгон. Ал өзүн көрсөтүп, ишеничтүү сүйлөп, атын чыгарып, анан акыркы мүнөттө качып кетүүнү көздөгөн. Мен анын ден соолугунда көйгөй болуп жатат деген маалыматка ишенбейм. Ачык машыгуулар учурунда ал жакшы эле жүргөн. Анын мындай аракети кесипкөйлүккө жатпайт", — деди Шевченко.
Валентина Шевченко КМШ өлкөлөрүндөгү кыз-келиндердин ичинен биринчилерден болуп UFC боюнча чемпиондук кур үчүн ат салышууда. Буга чейин эркектер арасында россиялык Хабиб Нурмагомедов чемпион болгон.
