12:35 29 Жалган Куран 2020
Түз эфир
  • USD80.2015
  • EUR88.3099
  • RUB1.0318
Спорт
Кыскача шилтеме алуу
507510

Кыздары кыйын кыргыздын. Бул сөздү спортчу Мээрим Момунова да тастыктайт. Ал алыш күрөшү, дзюдо боюнча чебер. Кошумча кросс-фит менен да алектенип мелдештерге катышууга белсенип жүргөн чагы.

Мээрим Момунова 1990-жылы 22-январда Чүй облусундагы Аламүдүн районунун Арчалы айылында туулган. Алыш, бел боо күрөшү, дзюдо боюнча КРдин бир нече жолку чемпиону, эл аралык турнирлердин жеңүүчүсү. 2017-жылы Түркмөнстандын Ашхабад шаарында өткөн жабык имараттагы Азия оюндарында алыш боюнча алтын, бел боо күрөшү боюнча күмүш медаль тагынган. Алыш күрөшү боюнча эл аралык класстагы спорт чебери, машыктыруучу. Дзюдо боюнча спорт чебери.

Спортчу Мээрим Момунова Sputnik Кыргызстан маалымат агенттигине спорттогу жолу, үй-бүлөсү, жеке жашоосу жана алдыдагы пландары тууралуу маек куруп берди.

— Мээрим, былтыр сиз үчүн жемиштүү жыл болду. Быйыл алдыга кандай пландарды койдуңуз?

— Чоң максаттарымдын бири күзүндө Индонезияда өтө турчу Азия оюндарына жана Көчмөндөр оюнуна катышуу. Азыр бир аз сыркоолоп жүрөм. Саламаттыгымды ордуна келтирип алсам республикадагы мелдештерден калбай катышам. 

Чемпионка в соревнованиях по борьбе алыш 5-х Азиатских игр в закрытых помещениях и по боевым искусствам в Ашхабате Мээрим Момунова
© пресс-служба ГАМФКиС
Балбан кыз былтыр Түркмөнстандын Ашхабад шаарында өткөн жабык имараттагы Азия оюндарында алыш боюнча алтын, бел боо күрөшү боюнча күмүш медаль тагынган

— Ири мелдештерге катышуу үчүн өлкө ичинде биринчи аталуу керек. Кыргызстанда сиздин салмак чениңизде атаандаш күчпү?

— Мен килемге 60-65 килограмм салмакта чыгам. Кээде кыздар ошол салмактан өйдө көтөрүлүп же түшүп кеткен учурлар болот. Атаандаштык болбосо өсө албайсың. Килемге кандай гана кыз чыкпасын, ал мага атаандаш. Өзүң профессионал болсоң да, кээде жаңы чыгып келе жаткан балбанга утулуп каласың. Ошондуктан бардык учурда кооптонуу болот. Мен үчүн атаандаштарымдын бардыгы күчтүү. Кыргызстан кичинекей, балбан кыздарыбыз дагы саналуу. Бири-бирибиздин күрөшүү ыкмаларыбызды жаттап алганбыз. Бирок ким көбүрөөк мээнет кылса, жеңиш ошонуку.

— Бир эле учурда спорттун алыш күрөшү, дзюдо жана кросс-фит менен алектенет экенсиз. Бардыгына кантип жетишесиз?

— Каалоо болсо убакыт да табылат. Кросс-фит — менин эртең мененки машыгуум. Бул боюнча бизде мелдештер абдан аз өтөт. Болсо катышайын деген ниетим бар. Алыш олимпиадалык спорттун түрүнө кирбегендиктен эл аралык турнирлер менен чектелебиз. 16 жашыман тарта дзюдо менен алектенип, тогуз ирет өлкө чемпиондугун багындырдым. Ал жактагы ыкманы деле алышта колдоно алдым. Дзюдонун эрежелери япон тилинде болсо, алыш кыргыз тилинде болгондуктан жүрөгүмө жакын кабыл алам.

— Бирок дзюдо менен Олимпиадага катышуу мүмкүн да?

— Дзюдодо жыйынтык көрсөтүү кыйын, атаандаштык күч. Олимпиада оюндарына катышуу үчүн ири турнирлерге катышып упай топтошуң керек. Менде байма-бай турнирлерге катышууга мүмкүнчүлүк жок.

— Спорттон тыш суроо берейин. Үй-бүлөңүз тууралуу кеп салсаңыз?

— Балалыгым ата-энем төрөлүп өскөн Аламүдүн районунун Арчалы айылында өттү. Үч бир туугандын экинчисимин, эжем жана иним бар. Кичинекей кезимде күчүмдү каякка жумшаарымды билбеген, бул көчөнүн башынан тиги көчөнүн аягына чейин чуркап барган элпек кыз болчумун. 10-классымда классташымдын сунушу менен дзюдого баргам. Ал жактагы машыктыруучум Талант Дүйшөбеков залга барбай калсам үйдөн келип сурап алып кетчү. Шаарга келгенде курама командага кирип, ал жакта жашап машыгып калдык.

Башында апам дене-башымдагы жаракаттарды көрүп залга барышыма каршы болуп жүрдү. Атам волейболду жакшы көрөт. Мага спорт жаатынан каршылык көрсөткөн жок. Бирок мелдештеримди көргөнү келишпейт. Атам эмоционалдуу адам. Бир жолу ата-энем менен таенем турнирге келгенде мен утулуп калгам. Ошондон кийин биз келсек утулуп калат экенсиң, үйдө эле болуп туралы деп тамашалашкан. 

Чемпионка в соревнованиях по борьбе алыш 5-х Азиатских игр в закрытых помещениях и по боевым искусствам в Ашхабате Мээрим Момунова
© Фото / Самат Дурусбеков
Мээрим Момунова: Максат мага көргөндө эле жылуу учурады, анан да шар жүргөн мүнөзү жакты.

— Кээде жакын адамыңыз менен түшкөн сүрөттөрдү көрүп калабыз…

— 2013-жылы социалдык тармактардын биринен таанышып, бирок ортодо байлашып үзүлүп жолукпай калганбыз. Былтыр Азия оюндарына барабыз деп турганда агайыбыздын телефону бузулуп калып, борбордогу ЦУМга каратканы барып калдык. Ал ошол жакта жүрүптүр. Бири-бирибизди ошондо таанып, анан номерлерибизди алып калганбыз.

Мен андан эки жаш улуумун. Кыз-жигит болуп сүйлөшкөнүбүзгө жарым жыл болуп калды. Спортту жакшы түшүнөт. Дем алыш күндөрү чогуу машыгабыз. Өзү убагында грек-рим күрөшү менен алектенип, кийин жүрөк оорусуна байланыштуу таштап койгон экен.

— Бири-бириңиздерге кайсы сапаттарыңыз жагыптыр?

— Ал мага көргөндө эле жылуу учурады, анан да шар жүргөн мүнөзү жакты. Ага менин күлүп жүргөнүм, жылмайганым жагыптыр.

 

 

— Эгер үй-бүлөнү же спортту тандаш керек болуп калсачы?

— Жаш кыз эмесмин. Турмуш кура турчу деле убактым келип калды. Бирок жакын адамым спорттогу жолума тоскоолдук кылбай, тескерисинче, көп эмгек кылдың, мүмкүнчүлүк болгондо максатыңа жет деп турат. Кийин спорттон жыйынтык көрсөтпөй калсам да, машыктыруучулукту аркалайм деген ой бар.

Тема боюнча

ТОП-15. Килем үстүнөн жолугабыз! Учурдун болуп-толуп турган балбандары ким?
7 жылдан кийин Кыргызстанга келген Шевченко: "Ош" базардагы түртүшмөйдү да сагындым
Жылмайган Турганбаев, сүрөөнү күч ирандыктар. Азия чемпионатынын ачылышы сүрөттө
Белгилер:
алыш, маек, дзюдо, спорт, Мээрим Момунова, Кыргызстан

ЭҢ МААНИЛҮҮ